Mutant Radio რამდენიმე თვეა სოციალურ ქსელში გამოჩნდა და უკვე უამრავი ადამიანის ყურადღება მიიქცია. LIVE სტრიმები, მიქსები, საავტორო გადაცემები, პანელ დისკუსიები, workshop-ები თუ ინტერვიუები… ეს არის მუსიკალური ონლაინ პლატფორმა, რომელიც ერთი კონკრეტული ჟანრით არ შემოიფარგლება, მეტიც, ის აერთიანებს სხვადასხვა მიმართულებებს, რაც მის მნიშვნელობას უფრო მრავალფეროვანს და საინტერესოს ხდის.

Mutant Radio-ს შექმნის იდეა უკავშირდება ნინა ბოჭორიშვილს, თათა ჯანაშიას და ვლადიმერ ნაჭყებიას.

,, რადიოს ფიზიკურ ნაწილზე რომ ვისაუბროთ, ეს არის ხის ქარავანი, რომელიც არის მობილური და შესაძლებელია მისი გადაადგილება ”.

რადიოს მიზანია აღმოაჩინოს ახალი ტალანტები, ხელი შეუწყოს მათ განვითარებას. გუნდის მიზანია წვლილი შეიტანონ მუსიკალური კულტურის გავრცელებაში, როგორც თბილისში და რეგიონებში, ასევე ქვეყნის ფარგლებს გარეთ. მთელი დღის განმავლობაში მსმენელს საშუალება ეძლევა მოუსმინოს გემოვნებიან მუსიკას და იხილოს, როგორც დამწყები, ასევე ბევრისთვის კარგად ცნობილი არტისტები, როგორებიც არიან: Nina Supsa, Kraumur, Hamatsuki, Natalie Beridze, Voiski, Nikakoi, Kvanchi, Gacha ... აგრეთვე თქვენ შეგიძლიათ მოუსმინოთ კვირეულ შოუებს, სადაც იხილავთ: ნია გვათუას ( LOVE IS IN THE AIR ), ჯაბა შავიშვილს ( DIGGერი ), რეზი ხუნწელიას,  გიორგი მოზგოვოის ( BASICS ) ...

ნინა ბოჭორიშვილის თქმით, რადიოს გახსნის იდეა მას შემდეგ გაჩნდა, რაც  თბილისში ჰოლანდიური RED LIGHT RADIO-ს რამოდენიმე საღამო ჩაატარეს. ,,ამ ივენთებს ძალიან კარგი გამოხმაურება მოჰყვა და ჩვენც მივხვდით, რომ ესეთი პლატფორმა საქართველოშიც აუცილებელი იყო”.

სამომავლოდ, Mutant Radio, FM სიხშირეზე გადასვლასაც გეგმავს, რაც ქართველი მუსიკოსების და ქართული სცენის განვითარებას, კიდევ უფრო მეტად შეუწყობს ხელს. ,, ახლო მომავლის გეგმებს რაც შეეხება, ვგეგმავთ უფრო მეტი გადაცემა დავამატოთ - სხვადსხვა მუსიკალურ მიმართულებებზე, და რაც შეიძლება მალე გავიდეთ საქართველოს სხვადასხვა რეგიონებში ".